Xabier Aierdi soziologoak ZAS! Zurrumurruen aurkako sarearen harira idatzitako iritzi artikulua da honako hau.
Garai txarrak dira lirikarentzat, eta, batez ere, berdintasunarekin eta aniztasunarekin zerikusia duenarentzat. Gutxitan izan dira hain indartsuak eta ugariak aurkariak, eta, gainera, elkarrekin egiten dute lan eta bitarteko asko dituzte. Herrialde askotan, eskuin-muturreko mugimenduak azaleratzen ikusten ditugu; ez daude eskuin faxistetara mugatuta, gero eta diskurtso landuagoa eratzen dute, eta, diskurtso hori hedatzeko, ukazio-multzo bat erabiltzen dute, edozein logika zientifikoren edo gertaeretan oinarritutako logikaren kontrakoa. Baina oso ondo lotzen dira herritarren sineste-sistemekin, eta, bereziki, egoera txarrean dauden herritarrekin. Sinesteen eta logika arrazionalaren arteko borroka ez da beti orekatua, eta, nagikeriagatik bakarrik bada ere, sinesmenak indar iraunkorrak dira eta beste guztiaren gainetik gailendu nahi izaten dute.
Egoera horren aurrean, funtsezkoa da aliantzak sortzea. Halaxe egin du, adibidez, ZAS! sareak TOKIKOMekin. Aurreiritziei eta zurrumurruei aurre egiteko aliantza ez da lan makala. Zentzu komunari aurre egin behar zaio, eta hori ez da behar bezala baloratzen. Ez da, hala esaten den arren, zentzumenik arruntena, baina ez da beti zentzu ona ere. Zentzu komuna espazio komunez josita dago, eta pertsona asko sinesmen batean bat etortzeak ez du esan nahi sinesmen hori egiazkoa denik edo errealitatea adierazten duenik.
ZAS! sareak TOKIKOMekin egindako aliantza emankorra eta luzea izatea espero dugu. Elkar ernaldu behar dute. ZAS! sareak arin erantzungo die TOKIKOMen galderei, arin eta zurrumurruei aurre egiteko gaitasunez, eta TOKIKOMek asko lagundu diezaioke ZAS sareari!, bi alderdi oso garrantzitsutan: gertaeren errealitatearekin bat datozen mezuak zabaltzen, eta komunikazio-eraginkortasunerako mekanismoak erakusten.
ZAS! sarean badakigu zeinen garrantzitsuak diren tokian tokiko testuinguruak. Ezin da sarerik sortu tokian tokiko eremuetan sartu gabe, eta, horregatik, sare hori indartzeko, ezinbestekoa da testuinguru horiek lehenesten dituzten komunikabideen sare bat izatea. Gainera, soziologiaren ikuspegitik, ikerketen arabera toleranteagoak diren biztanle-segmentuak izaten dira euskarazko komunikabideen hartzaileak. Hori garrantzitsua da xenofobiaren eta arrazakeriaren aurkako errelatua barneratzeko eta indartzeko. Laburbilduz, bi sareen arteko aliantza hori estrategikoa da ZAS! sarearentzat, eta uste sendo horren oinarrituta, eskertzen du Tokikom-ek zurrumurruen aurkako estrategiarekiko erakutsitako begirunea.
Testu hau ZAS!ek Tokikom sarearekin sinatutako hitzarmenaren parte da. Irakurgai duzue ere Tokikom-en parte diren hedabideetan.
